Awan-awan, lungguh jegang, nyanding wedhang, gegojekan karo poro kadhang. E…sinambi ngelipur penggalihe konco-konco sing lagi gelo.
Yo, Alhamdulillah, wektune terus mlaku tekan mangsane jam yahmene,.. Ora lali syukurku ijih diparingi ijin ngetutke lakune wektu.
Nyuwun ngapunten agi kelingan nyekel HP,.. ora koyo adat sabene, dino iki aku bubar mudun seko sanggar pamujan trus kumpul ndherek nyimak ono ing majelis elmu, terus bablas budal nang sawah..
Dasar wingi ora siram lombok tonat lan teronge,.. rasane kok kangen selak pingin weruh ijone gegodongan, tur yo khawatir mbok-mbok tetandurane podo alum.
Sakdurunge aku crito sing dowo, ora lali aku pingin nyenyuwun marang Gusti kang murbo ing dumadi… Mugo kabeh sedulurku podo diparingi sehat, arep ngopo-ngopo nek sehat ki rak yo kepenak. Mulo ojo do ngasi klalen bersyukur mergo awak sehat.
Mugo-mugo sedulurku sing agi duwe niat yo bakal kegayuh opo sing dadi niate,.. Dikuatke lan dilancarke urusane..
Yo niat opo wae, sing penting kudu niat apik,. …nek niat elek aku ra melu-melu..
Wis kedawan yo tulisanku,..?
Lha durung sido crito e… Njuk piye…?
Wis kadung niat ki,.. Mosok ndadak ditunda nggo sesok,.. Wah yo ra asyik lah..
Iki wae, crito oleh” seko sawah, dino iki aku neter winih kacang dowo.
Mbak-mbok ming kongono iku ono ilmune lho,..
Upomo,…
Mbokmenowo,.. seko salah sijine winih kuwi sesok bakal thukul, metu godonge trus dadi wit sing subur lan tekan mangsane metu kacange..
Seko sak wit e, mbokmenowo yo metu kacange akeh pating dloler… seko pirang-pirang dloleran mesthi yo akeh isine kacang,.. Upomo diwinihke kabeh mesthi iso dadi tambah akeh…
Seko siji dadi akeh, seko akeh iso dadi luwih akeh,.. Kamongko dino iki aku nandur jumlahe 44 winih.. Ra kebayang sesok dadi pirang kranjang le panen…
Iso ugo seko 44, ming thukul sebagian,.. keporo malah ra ono sing thukul. Utowo,.. Jane yo do thukul ning kepangan uler, njuk ra sido panen…
Utowo … do thukul tur yo ora dipangan uler,.. ning raiso ngrumat lan ngopeni,.. yo rasido panen.
Seko satu kebaikan iso oleh balesan 10x, 70x, atau bahkan 700x… Nek ikhlas ningo.
Ning arepo gawe amal akeh, nek ra ikhlas lillahi ta’ala… yo percuma, pong” bolong ibarate…
Misale sedekah ning riya’,.. nyumbang ning ngedumel,.. tetulung liyan ning ono pamrihe,.. Akhire amale entek dipangan kwawung.(*)
